Мадриднинг «Реал» клуби собиқ футболчиси Мигель Торрес жамоанинг «Севилья» устидан қозонган йирик ғалабасига муносабат билдириб, Винисиус Жуниорнинг йўқлиги мадридликлар ўйинига ижобий таъсир қилганини таъкидлади.
Испания чемпионатининг 9-турида «қироллик клуби» ўз майдонида «Севилья»ни 4:1 ҳисобида мағлуб этди. Торреснинг фикрича, бу мадридликларнинг жорий мавсумдаги энг яхши ўйини бўлди.
“Севилья”га қарши учрашув “Реал”нинг ушбу мавсумдаги энг яхши ўйини бўлди. Винисиуснинг таркибда йўқлиги мадридлик мухлисларга енгиллик бағишламоқда», — дея Торреснинг сўзларини келтиради Onda Cero.
Эслатиб ўтамиз, Винисиус дисквалификация сабаб мазкур баҳсда иштирок этмади. Бразилиялик ҳужумчисиз майдонга тушган «Реал» рақиб дарвозасига тўртта гол киритиб, ишончли ғалабани қўлга киритди.
