«Ливерпуль»нинг собиқ ҳимоячиси Жейми Каррагер «Манчестер Юнайтед»даги муаммоларга тўхталиб, клуб катта молиявий харажатларга қарамай, кутилган натижаларга эриша олмаётганини таъкидлади.

Sky Sports эфирида фикр билдирган собиқ футболчининг айтишича, манкунианликлар юқори маошли футболчиларни сотишдаги қийинчиликлар сабаб ўзига хос ёпиқ доирага тушиб қолган.

«Клуб трансферларга катта маблағ сарфласа-ю, футболчилар барибир кутилган даражада ўйнамаса, муаммолар пайдо бўлади.

Жамоа Чемпионлар лигасига чиқа олмаяпти, аммо шунга қарамай, футболчилар маоши учун энг кўп пул сарфлайдиган клублардан бири бўлиб қолмоқда.

Бундай вазият давом этаверса, бир мавсумда энг катта харажат қилган жамоага айланиш мумкин, лекин бу муваффақият кафолатланишини англатмайди.

Жамоа муваффақиятсизликка учрашда давом этса, футболчилардан қутулиш ҳам қийинлашади. Уларнинг маоши юқори, шу сабабли сотишнинг имкони бўлмайди. Ҳеч ким бундай футболчиларни ўз сафига қўшиб олишни истамайди.

Мана шу — «Манчестер Юнайтед» тушиб қолган ёпиқ доира», — деди Каррагер.

Эслатиб ўтамиз, «Манчестер Юнайтед» Англия Премьер-лигасининг 7-турида «Лидс» билан 1:1 ҳисобида дуранг ўйнади.

Мазкур натижадан сўнг манкунианликлар 7 очко билан турнир жадвалида 13-ўринни эгаллаб турибди.