Мадриднинг «Реал» клуби ҳужумчиси Килиан Мбаппе Франциянинг Onze Mondial журнали томонидан ўтган мавсумнинг энг яхши футболчиси деб топилганига муносабат билдирди.
Ушбу нуфузли мукофотга аввалги йилларда Зинедин Зидан, Криштиану Роналду ва Диего Марадона каби жаҳон футболи афсоналари ҳам сазовор бўлган.
Франциялик ҳужумчи бундай буюк футболчилар қаторида бўлиш ўзи учун катта шараф эканини таъкидлади.
«Улар футбол тарихида ўчмас из қолдирган буюк ўйинчилар. Қайси жамоада тўп суришидан қатъи назар, ўз ўйинлари билан ҳамиша барчани ҳайратда қолдиришган.
Албатта, бундай юксак савиядаги футболчилар билан бир қаторда бўлиш жуда ёқимли», — дея Мбаппенинг сўзларини келтиради Onze Mondial нашри.
Эслатиб ўтамиз, Мбаппе ўтган мавсумда «Реал» сафида 44 та учрашувда майдонга тушиб, 42 та гол урди ва 7 та голли узатма амалга оширди.
