Братиславанинг "Слован" клуби бош мураббийи Яя Туре Чемпионлар лигаси умумий босқичининг 3-турида "Рома"га қарши ўтказиладиган учрашув олдидан жамоасининг мақсадлари ҳақида гапирди.

Ивуарлик мутахассиснинг таъкидлашича, унинг шогирдлари Римга фақат ғалаба қозониш ниятида ташриф буюришган. Туре рақибнинг кучини эътироф этган ҳолда, футболчиларидан қўрқмасдан ҳаракат қилишни талаб қилмоқда.

"Бизни жуда кучли жамоага қарши учрашув кутмоқда. "Рома" таркибида айрим йўқотишлар бор, аммо шунга қарамай, улар хавфли рақиб бўлиб қолмоқда ва бизга жиддий муаммолар туғдириши мумкин.

Биз бу ерга ғалаба қозониш учун келдик. Ҳаммаси майдонда қандай ҳаракат қилишимизга боғлиқ. Имкон қадар юқори савияда ўйин кўрсатишимиз керак.

Аввалги икки учрашувдан кўп нарса ўргандик. Энди ўз характеримизни намойиш этиб, ҳеч нарсадан қўрқмасдан ўйнашни истаймиз", — деди Туре матбуот анжуманида.

Эслатиб ўтамиз, Яя Туре жорий йилнинг июнь ойида "Слован" бош мураббийи этиб тайинланган. Бунга қадар у Саудия Арабистони миллий терма жамоасида Роберто Манчинининг ёрдамчиси сифатида фаолият юритган.

Словакия клуби Чемпионлар лигасининг умумий босқичига саралаш учрашувлари орқали йўлланма олган. Бироқ дастлабки икки турда муваффақиятсизликка учраган.

"Слован" аввал "ПСЖ"га 1:6 ҳисобида мағлуб бўлган бўлса, кейинги баҳсда "Штутгарт"га 0:3 ҳисобида имкониятни бой берган.

"Рома" ва "Слован" ўртасидаги Чемпионлар лигаси умумий босқичининг 3-тур учрашуви 20 октябрь куни бўлиб ўтади.