"Ливерпуль" ярим ҳимоя чизиғини кучайтириш мақсадида икки футболчининг трансферини кўриб чиқмоқда. Мерсисайдликлар эътибор марказида "Борнмут" аъзоси Алекс Скотт ва "Монако" ярим ҳимоячиси Ламин Камара турибди.
Таниқли инсайдер Фабрицио Романонинг маълум қилишича, "Ливерпуль" бош мураббийлигига Андони Ираола тайинланганидан кейин Алекс Скотт клубнинг асосий трансфер мақсадларидан бирига айланган.
23 ёшли англиялик футболчи аввалроқ "Борнмут"да испаниялик мутахассис қўл остида ҳаракат қилган. Ираола ўзининг собиқ шогирдини янги жамоасида ҳам кўришни исташи мумкин.
Бироқ мазкур трансфер катта маблағ талаб қилади. Манбага кўра, Скоттнинг "Ливерпуль"га ўтиши тахминан 100 миллион фунт стерлингга тушиши мумкин.
Шу билан бирга, футболчига Лондоннинг "Челси" клуби ҳам қизиқиш билдирмоқда.
Мерсисайдликлар учун нисбатан арзонроқ вариант сифатида "Монако"нинг сенегаллик ярим ҳимоячиси Ламин Камара кўрилмоқда.
Камара ўтган ёзда "Челси"га ўтишга жуда яқин келган эди. Бироқ музокараларнинг якуний босқичида "Монако" раҳбарияти трансферни амалга оширишдан бош тортган.
Transfermarkt портали маълумотларига кўра, Алекс Скоттнинг бозор қиймати 70 миллион еврони, Ламин Камараники эса 55 миллион еврони ташкил этмоқда.
Айни пайтда "Ливерпуль" Англия Премьер-лигаси турнир жадвалида бешинчи ўринни эгаллаб турибди. Мерсисайдликлар пешқадам "Манчестер Сити"дан тўққиз очко ортда қолмоқда.
