АЕК бош мураббийи Марко Николич Чемпионлар лигаси умумий босқичининг 3-турида «Манчестер Сити»га қарши ўтказиладиган учрашув олдидан жамоасининг кайфияти ҳақида гапирди.
Баҳс 20 октябрь куни Манчестердаги «Этиҳад» стадионида бўлиб ўтади. Учрашув Тошкент вақти билан 21 октябрга ўтар кечаси соат 00:00 да бошланади.
«Биз ҳаяжондамиз. Бизни топ-даражадаги жамоа, юқори савияли футболчилар ва ажойиб мураббийга қарши учрашув кутмоқда. Бу жамоа жуда чиройли футбол намойиш этади ва ўз майдонида ўйнайди.
Биз ўз ўйин услубимизни ўзгартирмаймиз, характеримиз ва ўзига хослигимизни намойиш этамиз. Агар ҳимоявий ўйин билан бошласак, бу бизга ёрдам бермайди.
Тўпни назорат қилиш ва ҳужумга ўтиш учун имкониятлар топишимиз керак. Бу осон бўлмайди, аммо ҳаракат қилиб кўришимиз шарт», — дея Николичнинг сўзларини келтиради УЕФА матбуот хизмати.
Шунингдек, мутахассис «Манчестер Сити» ҳужумчиси Эрлинг Холанннинг учрашувда иштирок этмаслиги эҳтимоли ҳақидаги саволга ҳам жавоб берди.
«Холанн — энг яхши ҳужумчилардан бири. Мен учун у дунёдаги энг яхши ҳужумчи.
Ҳатто рақибим бўлса ҳам, футболчининг жароҳат сабаб майдонга туша олмаслигидан ҳеч қачон хурсанд бўлмайман. Мен бундай инсон эмасман.
Унга тезроқ соғайиб, майдонга қайтишини тилайман», — дея қўшимча қилди мураббий.
АЕК Чемпионлар лигаси умумий босқичининг дастлабки икки турида ЛАСКни 1:0 ҳисобида мағлуб этди ва «Шахтёр»га 1:3 ҳисобида имкониятни бой берди.
«Манчестер Сити» эса «Порту» устидан 2:0 ҳисобида ғалаба қозониб, «ПСЖ»га 2:4 ҳисобида мағлуб бўлди.
