«Ливерпуль»нинг собиқ ярим ҳимоячиси Дитмар Хаманн Флориан Вирцнинг мерсисайдликлар сафида муваффақият қозонишига ишонмаслигини билдирди.
Унинг фикрича, германиялик футболчи ўз имкониятларига бўлган ишончни йўқотган.
«Вирцнинг «Ливерпуль»да муваффақият қозонишини тасаввур қила олмаяпман», — деди Хаманн GIVEMESPORT нашрига Betpack орқали берган интервьюсида.
«Менимча, у ўз қобилияти ва имкониятларига бўлган ишончни бутунлай йўқотган. Унинг ўзи ҳам Англия Премьер-лигаси талабларига жавоб бера олишига ишонмайди, деб ўйлайман», — дея қўшимча қилди собиқ футболчи.
Хаманннинг таъкидлашича, бош мураббий Вирцдан ўнинчи рақам позициясида фойдаланишни режалаштирганига қарамай, футболчининг ўйини ўтган мавсумга нисбатан яхшиланмаган.
Флориан Вирц «Байер»дан «Ливерпуль»га 116 миллион фунт стерлинг эвазига кўчиб ўтган. Ўша пайтда бу трансфер мерсисайдликлар тарихидаги энг қиммат харид ҳисобланган.
Германиялик футболчи барча мусобақалар доирасида 58 та учрашувда майдонга тушиб, 7 та гол урган ва 13 та голли узатмани амалга оширган.
Шунингдек, «Ливерпуль»нинг собиқ ҳимоячиси Жейми Каррагер ҳам Вирцнинг ўйинини мунтазам равишда танқид қилиб келмоқда.
