«Бавария» бош мураббийи Венсан Компани «Арсенал»га қарши Чемпионлар лигаси учрашуви арафасида соғлиғи билан боғлиқ жиддий муаммоларга дуч келмоқда.

Аввалроқ хабар қилинганидек, бельгиялик мураббий шанба куни «РБ Лейпциг»га қарши учрашув вақтида сон-чаноқ бўғими соҳасида кучли оғриқни ҳис қилган. У деярли бутун ўйинни захира ўриндиғида ўтказган, майдон четидан футболчиларга кўрсатмаларни эса унинг ёрдамчиси Аарон Дэнкс берган.

Bild нашри маълумотларига кўра, душанба куни Компани уйида қолган ва жамоанинг ёпиқ машғулотида қатнашмаган. Уни жамоа шифокори Роланд Шмидт бошчилигидаги тиббий ходимлар кўрикдан ўтказган, машғулотни эса бош мураббийнинг ёрдамчилари бошқарган.

tz нашри хабар беришича, сон-чаноқ бўғимидаги муаммолар грипп билан боғлиқ бўлиб, вирус аввалдан мавжуд бўлган чандиқ тўқимасига таъсир қилмоқда. «Лейпциг»га қарши ўйинда Компани зинадан қийналиб кўтарилган. Танаффус пайтида ва якуний ҳакам ҳуштаги чалингандан кейин эса унга «Альянц Арена»даги диванда ётиб дам олишга тўғри келган.

Ўйиндан кейин мураббий журналистлар билан мулоқотда ҳам иштирок этмаган. Унинг ўрнига «Бавария» спорт директори Макс Эберль чиқиш қилган.

Сешанба куни Компани яна машғулотни ҳамда ўйинолди матбуот анжуманини ўтказиб юборган. Клубда бу ҳолатни вирусли инфекция сабабли дам олиш зарурати билан изоҳлашган.