«Фенербахче» Чемпионлар лигаси умумий босқичининг 3-турида ўз майдонида «Славия»ни мағлуб эта олмади (2:2). Истанбул клубининг мусобақа асосий босқичидаги ғалабасиз серияси 10 та ўйинга етди.

Прагаликларга қарши учрашувга қадар Туркия жамоаси Чемпионлар лигасида кетма-кет 9 та ўйинда ғалаба қозонмаган эди — 3 та дуранг ва 6 та мағлубият. УЕФА буни «Фенербахче» тарихидаги энг узоқ ғалабасиз серия сифатида қайд этган. «Славия» билан дурангдан кейин мазкур кўрсаткич 10 та учрашувга етди — 4 та дуранг ва 6 та мағлубият.

Истанбулликларнинг мусобақа асосий босқичидаги сўнгги ғалабаси 2008 йил апрель ойига тўғри келади. Ўшанда «Фенербахче» чорак финалнинг дастлабки учрашувида «Челси»ни 2:1 ҳисобида мағлуб этган. Жавоб баҳсида эса Туркия клуби 0:2 ҳисобида ютқазиб, мусобақани тарк этган.

«Фенербахче» Чемпионлар лигасининг кейинги — 2008/09 йилги мавсумини ғалабасиз якунлаган: гуруҳ босқичида 2 та дуранг ва 4 та мағлубият. Шундан сўнг жамоа 18 йил давомида мусобақанинг асосий босқичига чиқа олмаган.

Жорий мавсумда «Фенербахче» умумий босқични «Рома» билан дуранг (1:1) орқали бошлади, кейин «Астон Вилла»га 0:6 ҳисобида мағлуб бўлди ва «Славия» билан очколарни бўлишиб олди.