Мадриднинг «Реал» клуби собиқ бош мураббийи Хорхе Вальдано Испания чемпионатидаги ҳакамликдан, аниқроғи, бу мавзунинг доимий муҳокама қилинишидан чарчаганини билдирди.
«Буларнинг барчаси жонимга тегди. Мен бундан ниҳоятда чарчадим. Биз ажойиб голларни кўрамиз, юқори савияли футболчиларнинг ўйинига гувоҳ бўламиз... Аммо охир-оқибат барибир ҳакамлар ҳақида гапирамиз — яна ҳакамларни муҳокама қиламиз. Бу жараёнда футбол иккинчи даражага тушиб қолди», — дея собиқ мураббийнинг сўзларини ElDesmarque нашрига таяниб derbyderbyderby.it келтиради.
Эслатиб ўтамиз, Хорхе Вальдано 1994 йилдан 1996 йилгача Мадриднинг «Реал» клубини бошқарган. Ҳозирда жамоага португалиялик мутахассис Жозе Моуриньо устозлик қилмоқда.
