Жорий йилнинг 4-6 октябрь кунлари пойтахтимиздаги “Ўзбекистон” спорт саройида дзюдо кураши бўйича ўтказилган Гран-При туркумидаги халқаро турнирда Ўзбекистон терма жамоаси 5 та олтин, 3 та кумуш ва 5 та бронза медалини қўлга киритиб, умумжамоа ҳисобида биринчи ўринни эгаллади.

Дунёнинг 21 давлатидан келган 154 нафар дзюдо усталари иштирокида бўлиб ўтган мазкур нуфузли мусобақада Ватанимиз шарафини ҳимоя қилган 48 нафар спортчимиздан 13 нафари совринли ўринларни банд этишган бўлса, 9 нафар полвонимиз 5-ўринни ва яна 13 нафар дзюдочимиз 7-ўринни банд этишди.

Умумжамоа ҳисобида Бразилия терма жамоаси иккинчи (3 та олтин, 2 та кумуш, 3 та бронза), америкалик дзюдо усталари эса учинчи ўринни (1 та олтин, 3 та кумуш) банд этишди. Қизиқ томони, дзюдо ватани вакиллари япониялик полвонлар мазкур Гран-При турнирида бирорта ҳам медални қўлга кирита олмадилар.

Маълумки, мазкур Гран-При турнирида биринчи ўринни эгаллаган спортчилар 2016 йили Рио-де-Жанейро шаҳрида (Бразилия) ўтказиладиган XXXI ёзги Олимпиада ўйинлари йўлланмалари учун бериладиган 300 рейтинг очколарига ҳам эга бўлдилар. Кумуш медал совриндорлари 180 рейтинг очкога, бронза медали соҳиблари эса 120 рейтинг очкога эгалик қилишди.

Қуйида Гран-При турнирида совринли ўринларни эгаллаган Ўзбекистон терма жамоаси аъзолари берилган:

Олтин
-60 кг. Шарофиддин Лутфуллаев
-66 кг. Мирзоҳид Фармонов
-73 кг. Мирали Шарипов
-90 кг. Шерали Жўраев
-100 кг. Соиб Қурбонов

Кумуш
-90 кг. Эркин Дониёров
-100 кг. Рамзиддин Саидов
+100 кг. Болтабой Болтаев

Бронза
-81 кг. Яҳё Имомов
-90 кг. Дилшод Чориев
-48 кг. Нодира Гулова
-70 кг. Гулноза Матниёзова
+78 кг. Сенайим Эркинбоева