Аргентинанинг «Эстудиантес» клуби 2026 йилги Либертадорес кубоги финалига йўл олди. Жамоанинг бу муваффақиятида 40 ёшли дарвозабон Фернандо Муслера ҳал қилувчи роль ўйнади.

Бразилиянинг «Фламенго» клубига қарши сафарда ўтказилган жавоб учрашувининг асосий вақти 0:0 ҳисобида якунланди. Пенальтилар сериясида эса «Эстудиантес» 3:2 ҳисобида ғалаба қозониб, финал йўлланмасини қўлга киритди.

Уругвайлик тажрибали дарвозабон Фернандо Муслера пенальтилар сериясида учта зарбани қайтариб, учрашув қаҳрамонига айланди.

У «Фламенго» футболчилари Жоржиньо, Лукас Пакета ва Бруно Энрикенинг зарбаларини бартараф этиб, жамоасининг ҳал қилувчи босқичга чиқишига катта ҳисса қўшди.

Қайд этиш жоиз, 40 ёшли Муслера жорий мавсумда барча мусобақалар доирасида 34 та учрашувда майдонга тушган. Ушбу баҳсларда дарвозабон 22 та гол ўтказиб юборган ва 15 марта ўз дарвозаси дахлсизлигини сақлаб қолган.

«Эстудиантес» Либертадорес кубоги финалида Бразилиянинг «Палмейрас» клубига қарши майдонга тушади.

Мусобақанинг ҳал қилувчи учрашуви 28 ноябрь куни Уругвай пойтахти Монтевидеода бўлиб ўтиши режалаштирилган.