"Ювентус" бош мураббийи Лучано Спаллетти жамоанинг 3-5-2 тактик схемасига ўтиши ҳақида фикр билдирди. Мутахассис таркиб ва ўйин схемасини танлаш унинг масъулияти эканини таъкидлади.
"Бу яхши схема. Уни танлаш футболчиларимизни баҳолашдан бошланади, бироқ таркибнинг ўзига хос хусусиятларини ҳам унутмаймиз. Бошқа ўйин сифатларига эга футболчиларни эътиборсиз қолдира олмаймиз. Жойлашувни бироз ўзгартириш орқали 3-4-2-1 схемасига ўтиш мумкин", — дея Спаллеттининг сўзларини келтиради Football Italia.
"Бу қарор фақат яқиндаги ўйинлар ёки бир-икки футболчини руҳлантириш учун эмас, балки келажакни кўзлаб қабул қилинган. Айримлар жамоанинг ўзи ушбу схемада ўйнашни сўраганини айта бошлашди. Бундай қарорлар футболчилар ваколатига кирмайди. Мен жиддий футболчилар билан ишлаяпман. Улар қайси схема бўйича ўйнашимизни белгилашга журъат этмаган бўларди, чунки бу жамоадошларига нисбатан ҳурматсизлик бўлар эди".
"Ювентус" чемпионатнинг саккизта туридан кейин турнир жадвалида еттинчи ўринни эгаллаб турибди.
