Англия терма жамоасининг собиқ футболчиси Жейдон Санчо Испаниянинг «Хетафе» клубига ўтишдан бош тортди. Бу ҳақда The Touchline хабар бермоқда.
Томонлар ўртасидаги музокаралар молиявий келишмовчиликлар туфайли муваффақиятсиз якунланган. Манбага кўра, Санчонинг ўзи «Хетафе» президенти Анхель Торресга ўз қарорини маълум қилган.
Англиялик футболчи йилига камида 3 миллион евро маош олишни истаган. Бироқ клубнинг дастлабки таклифи тахминан 400 минг еврони ташкил этган. Кейинчалик испанияликлар таклиф миқдорини сезиларли даражада оширган бўлса-да, томонлар келишувга эриша олмаган.
Эслатиб ўтамиз, Санчо 2026 йилнинг ёзида шартнома муддати тугагач, «Манчестер Юнайтед»ни тарк этган. Шундан буён у эркин агент мақомида қолмоқда.
