"Ан-Наср" ҳужумчиси Криштиану Роналду Саудия Арабистони чемпионатидаги "Ал-Холуд"га қарши ўйинда (5:3) хет-трик қайд этганига қарамай, тўпурарлар пойгасида пешқадамдан анча ортда қолмоқда.

41 ёшли португалиялик футболчи 66-дақиқадан 81-дақиқагача бўлган вақт оралиғида учта гол урди. Шу тариқа, унинг жорий чемпионатдаги голлари сони 7 тага етди.

Роналду бу кўрсаткич билан "Ал-Иттиҳод" ҳужумчиси Юссеф Эн-Несири ва "Ал-Қодисия" футболчиси Матео Ретеги билан биргаликда учинчи ўринни бўлишиб турибди.

Тўпурарлар пойгасида "Ал-Аҳли" ҳужумчиси Айвен Тони 12 та гол билан пешқадамлик қилмоқда. Иккинчи ўринда эса 8 та гол урган "Ал-Қодисия" ярим ҳимоячиси Тижани Рейндерс жойлашган.

Роналдунинг бутун фаолияти давомида урган голлари сони 985 тага етгани қайд этилмоқда. Бироқ айрим ҳисоб-китобларда бу кўрсаткич 984 та деб берилган.

Эслатиб ўтамиз, ўтган мавсумда Роналду 28 та гол билан Саудия чемпионатининг учинчи тўпурари бўлган. Ундан Хулиан Киньонес (33) ва Айвен Тони (32) яхшироқ натижа кўрсатган эди.