«Милан» ва «Порту»нинг собиқ бош мураббийи Сержиу Консейсау янги клуб танлашда нималарга эътибор қаратишини маълум қилди.
«Менга ўз ғояларим, иштиёқим ва ғалабага бўлган интилишимни амалга ошира оладиган лойиҳа керак. Фақат футболчилар эмас, клуб раҳбарияти, тузилмаси ва мухлисларнинг мақсадлари ҳам бир-бирига мос келиши шарт.
Мен шунчаки навбатдаги мураббий бўлиш учун эмас, совринлар ютиш учун ишлашни истайман. Сўнгги саккиз йилда деярли доим совринлар қўлга киритдим ва шу йўлда давом этмоқчиман», — деди Консейсау.
51 ёшли португалиялик мутахассиснинг сўнгги иш жойи «Ал-Иттиҳод» бўлган. У июнь ойи бошида клубдан истеъфога чиқарилган.
