"Манчестер Юнайтед" ярим ҳимоячиси Андрей Сантос "Челси"дан 50 миллион фунтга амалга ошган трансфери қандай бошланганини айтиб берди.

Бразилиялик футболчи июль ойида манкунианликлар сафига қўшилган ва клуб билан 2031 йил июнигача шартнома имзолаган.

"Ҳаммаси жуда тез содир бўлди. Болаларимни педиатрга олиб кетаётганимда агентим қўнғироқ қилиб, "МЮ" мен билан суҳбатлашмоқчи эканини айтди. Қачон вақтим борлигини сўраганида, ҳозирнинг ўзида, деб жавоб бердим.

Машинани тўхтатдим, болаларимни рафиқам билан шифокорда қолдириб, автотураргоҳга чиқдим ва клуб президенти ҳамда мураббийи билан гаплашдим. Ўша суҳбатдан икки кун кейин "Челси" машғулотларига қайтишим керак эди", — деди Сантос ESPN Brasil нашрига.

Маълум қилинишича, "Манчестер Юнайтед" трансфер бўйича келишувга 48 соат ичида эришган. Клуб футболчи учун 48 миллион фунт тўлаган, яна 2 миллион фунт бонуслар кўринишида назарда тутилган.

Сантос ўтган мавсум "Челси" сафида барча мусобақаларда 43 та учрашув ўтказиб, 3 та гол урган.