Кеча Россия Биринчи дивизионида биринчи давранинг сўнгги тур баҳслари бўлиб ўтди. "Газовик" сафарда "Балтика" билан куч синашди ва мағлубиятга учради — 0:2.

Учрашувнинг дебюти оренбургликлар учун жуда омадсиз кечди. Ўйиннинг 9-дақиқасига келиб мезбонлар 2та гол уриб бўлишганди. Санжар Турсунов иккинчи бўлим бошида майдонга туширилди. Аммо у ҳам жамоасини мағлубиятдан қутқара олмади.

"Салют" сафида Вадим Афонин 90 дақиқа ҳаракат қилди. Белгородликлар ўз майдонларида "Енисей"ни мағлуб эта олишмади - 1:1.

"Нефтехимик" ҳам ўз уйида "Уфа" билан дуранг ўйнади. Учрашувнинг 65-дақиқасида захирадан тушган Даврон Мирзаев ўйин тугашига 2 дақиқа қолганида гол уриб, жамоасини мағлубиятдан қутқариб қолди.

Ушбу мағлубиятдан кейин "Газовик" биринчи даврани 9-ўринда якунлашга мажбур бўлди. "Уфа" 5-ўринда бораётган бўлса, "Салют" 14-ўринни эгаллаб турибди.