"Реал" бош мураббийи Карло Анчелотти "Ювентус"га қарши учрашувдан сўнг матбуот анжуманида иштирок этди ва қуйидагича фикр билдирди.

"Иккинчи таймда ўйинни назорат қилишни ва тезликни камайтириб юбордик. Тўпни етарли даражада кўп йўқотдик. Аммо рақибнинг ўзи бизга босим ўтказганда, биз прессинг уюштиришимиздан маъно йўқ эди. Ўйин охирида "Ювентус" хавфли қарши ҳужумлар уюштирди.

Мен учун рақибнинг Ди Мария ва Криштиану Роналдуни ёпиш мақсадида тўрт ҳимоячи билан тушгани кутилмаган ҳол бўлди. "Ювентус" жуда яхши ўйнади ва бизга кўп қийинчиликлар келтириб чиқарди. Айниқса Тевесни алоҳида таъкидлашни истардим. Чап қанотда рақибимиз ажойиб ўйин кўрсатди.

Бэйл қанотлардан бирида ҳали ўз ўрнини топади. У бирга-бир вазиятларга чиқиб бора олади, сабаби унинг тезлиги зўр. Аммо марказда ўйнаш учун баъзи сифатларга эга эмас", - деди Анчелотти.