Ўсмирлар ўртасидаги ЖЧнинг "F" гуруҳида Нигерия ва Швециядан кейин Мексика ҳам нимчорак финал йўлланмасини йўлга киритди.

Нигерия кутилганидек сўнгги турда ҳам ғалаба қозонди (Ироқ устидан, 5:0) ва ўз гуруҳида 1-ўринни қўлга киритди. Африкаликлар 1/8 финалда "Е" гуруҳида 2-ўринни эгаллаган жамоа билан баҳс юритади.

Швеция ва Мексика терма жамоалари ўртасидаги ўйинда томонларни дуранг натижа ҳам қаноатлантирарди. Ўйин голсиз дурангга қараб бораётганди. Бироқ ўйин тугашига 4 дақиқа қолганида мексикаликлар бурчак тўпидан кейин гол уришга муваффақ бўлишди ва ғалабани қўлга киритишди.

Натижада бу гуруҳда 2-ўрин Мексикага, 3-ўрин Швецияга насиб этди. Мексика нимчорак финалда Италия билан баҳс олиб борса, шведлар эса Япония ўсмирларга қарши майдонга чиқадилар.

Биз билан бир гуруҳда иштирок этган Хорватия эса нимчорак финалдан бутунлай умидни узиб бўлди. Россия терма жамоаси эса "E" гуруҳи ўйинлари якунланишини кутади.

Ўсмирлар ўртасида ЖЧ
"F" гуруҳи, 3-тур
Нигерия - Ироқ - 5:0
Голлар: Муҳаммад (3), Нвакали (4), Яҳё (16, 41), Обаси (90)

Швеция - Мексика - 0:1
Гол: Жеймс (86)