Футзал бўйича Осиё чемпионатига саралаш босқичининг Марказий Осиё жамоалари ўртасидаги мусобақа кутилмаган натижа билан бошланди. Тожикистон миллий терма жамоаси кутилмаганда Қирғизистон устидан 8:4 ҳисобида ғалаба қозонди.

Таркиби катта футбол ўйинчиларидан ташкил топган тожикистонликлар биринчи бўлимда рақибга нисбатан индивидуал жиҳатдан устунлик қилди ва Қирғизистон дарвозасини жавобсиз 4 марта ишғол қилди.

Тожиклардан бундай "тарсаки"ни кутмаган Қирғизистон иккинчи бўлимда ташаббусни ўз қўлига олиб, рақиб дарвозасини кетма-кет ишғол қила бошлади. Ҳисоб 4:2 бўлиб турганида ўйновчи-мураббийи Нуржан Жетибаев ўйновчи-дарвозабон сифатида майдонга тушди ва ҳисобни 4:3гача қисқартирди. Шундан кейин эса қирғизлар "бешинчи ўйинчи" тактикаси асосида ҳаракат қила бошлашди ва жазоланишди. Камалетдинов шогирдлари аввалги бўш қолган дарвозани икки марта ишғол қилган бўлса, яна 2 марта қарши ҳужумда гол ура олишди. Қирғизистон эса ўйин тугашига бир неча сония қолганида битта гол ура олди холос. Якуний ҳисоб - 8:4. Ушбу баҳсда тожикистонлик Хуршед Маҳмудов 5та гол уришга муваффақ бўлди.

Соат 19:00да Ўзбекистон ва Туркманистон терма жамоалари майдонга чиқишади.

ҚИРҒИЗИСТОН - ТОЖИКИСТОН 4:8
Голлар: Н. Жетибаев (25, 35), Д. Кадиров (31), М.Сундеев (40) -  Ўлмасов (11, 36), Жумаев (15), Х. Маҳмудов (16, 18, 37, 38, 40)