6 ноябрь куни Қибрай стадионида аёллар футболи бўйича Ўзбекистон Кубогининг финал учрашуви ўтказилди. Финалда Қаршининг “Севинч” ҳамда Муборакнинг “Машъал” жамоаси қизлари ўзаро тўқнаш келишди. Ўзига яраша қизиқарли ва шиддатли кечган баҳсда “машъалчилар” 2:4 ҳисобида мағлуб бўлишди.

Албатта, “Севинч” мамлакатимиздаги энг кучли жамоа ҳисобланади. Яқинда улар Ўзбекистон чемпиони ҳам бўлишди. Шунга қарамай, “Машъал” футболчилари уларга жиддий қаршилик кўрсатишга ҳаракат қилди. Аммо бу ўйинда тажриба ва маҳорат барибир устун келиб, “Севинч” ғалаба қозонди.

Шунга қарамай, “Машъал” учун Кубок финалида иштирок этишнинг ўзини муваффақият десак бўлади. Ташкил этилганига энди бир йил тўладиган жамоа ўзининг илк мавсумида чемпионатда бешинчи ўринни эгаллади, Кубокда эса финалга қадар етиб келди. Табиийки, бу Муборакдек кичик шаҳар жамоаси учун катта натижа саналади.