1928 йилнинг 13 октябрь куни футбол тарихида футболчиларга рақам туширилган кун сифатида муҳрланиб қолган. Биринчи марта бу ҳодиса қайси ўйинда рўй берганини биласизми? Бу Лондоннинг «Арсенал» ва «Челси» жамоалари ўйинида рўй берган ва ўшанда ўйин протоколида «1»дан «11»гача бўлган рақамларни кўришингиз мумкин эди. Рақам қўйиш бу санадан ўн йил олдин урфга кирганди, аммо футболкаларга рақам қўйилган расмий сана сифатида 1928 йилнинг 13 октябрида эътироф этилган.
Бу нарса ўйлаб чиқилганлигининг сабаби, бир футболчини бошқа футболчидан ажратиб олишдир. Чунки ўша пайтда аксарият мухлислар яхши ёки ёмон ўйнаётган футболчиларни тезда ажратиб ололмасдилар. Илк маротаба футболчилар асосан «1»дан «11» гача бўлган рақамлар остида майдонга тушардилар.
Футбол майдонида одатда «1»дан «99»гача бўлган рақамлардан фойдаланишади. Аммо баъзи баъзида ноодатий рақамлар ҳам учраб туради. Яқин ўтмишда Шотландиянинг «Абердин» клуби аъзоси Хишем Зеруали ҳаммани ажаблантирган ҳолда майдонга «0» рақамида тушган. Мухлислар ҳатто унга эркалаб “Зеро” деб лақаб қўйиб олишган.
Майдонда «1» рақам одатда дарвозабонларники ҳисобланади. Шу сабабли ҳам «1» рақамда бошқа амплуа вакилларини учратиш анча ноодатий. Лекин ушбу рақамда майдонга тушган футболчиларни жаҳон футболида учратиш мумкин. Масалан, ўз вақтида «Чарлтон» аъзоси Стюарт Балмер, «Слима Уондерерс» клубидан Жо Бринкет, «Партизан» футболчиси Симон Кукчевич ва АEКда фаолият юритган Пантелис Кафес дарвозабонларнинг рақамларида майдонга тушишган. Шунингдек Чиапасско шаҳрининг «Ягуар» жамоасида тўп сурган Адолфа Баутиста Мексика Футбол Федерациясининг рухсатига кўра «1» рақамда тўп сурган. Сўнгра у Гвадалахаранинг «Депортиво» клубида «100» рақам остида иштирок этган.
1996/1997 йилги мавсумда Мексиканинг «Монтеррей» клуби ўзининг етакчи футболчиларидан бири бўлмиш Хесус Арелянога «400» рақамни беришди. Бунинг сабаби ўша йили футболчининг она шаҳри ўзининг 400 йиллик юбилейини нишонлаётган эди. Бунақа рақам остида яна Бразилиянинг «Гояс» жамоаси дарвозабони Харли жамоасининг 400-юбилей ўйинида майдонга тушганди. Австриялик футболчи Андреас Хертсог терма жамоадаги ўзининг 100-ўйинида айнан «100» рақами остида иштирок этиб, мухлисларни ҳайратга солганди.
1958 йилги Жаҳон чемпионатида чемпионликни қўлга киритган Бразилия терма жамоасининг дарвозабони Жилмар «3» рақами остида ўз дарвозасини қўриқлаган. Голландия терма жамоаси голкипери Янгблад эса «8» рақами остида мундиалда иштирок этган.
2011 йилги Осиё Кубогида ҳамюртларимизни ярим финалга чиқишига катта хизмат қилган Улуғбек Бақоев ҳужумчилар учун анча нооадит бўлган «2» рақамида 2 та ўйинда майдонга тушиб, 2 та гол урганди.
Японияда кўплаб футболчилар «4» рақамли либос остида ўйнашдан бош тортишади. Фонетика нуқтаи-назардан «Кунчиқар мамлакат»да «тўрт» рақами «ўлим» сўзи билан маънодош. Шу туфайли япон футболчилари бу рақамни хосиятсиз санаб, ундан йироқроқ юришади.
Чилилик Иван Самарано «Реал»дан Миланнинг «Интер» клубига ўтгач ўзининг севимли «тўққиз» рақамида тўп сурарди. Лекин кейинчалик жамоага Роналдо келгач, Самаранонинг рақамини бразилиялик футболчига беришди. Шунда «Иван Грозний» «18» ўзига олди, рақамлар орасига эса «+» белгисини қўйди.
Ивандан «Интер»га ўтиб «9» рақамни тортиб олган Роналдо, «Милан»га ўтгач ана шу рақамни жамоанинг фантастик ҳужумчиси Филиппо Инзагидан тортиб ололмади. Шу сабабли у икки тўққизни бирлаштиришга қарор қилди ва «99» рақамни танлади. «Милан»даги фаолияти мобайнида эса 9 та гол уришга эришди. Кейинчалик «Милан» таркибига қўшилган яна бир бразилиялик машҳур футболчи Роналдиньо ҳам одатий рақами банд бўлганлиги боис ўзининг туғилган йилини эслатувчи «80» рақамини олишга қарор қилди. Ушбу футболчилардан кейин «Милан»нинг яна икки аъзоси ҳам ноодатий рақамларни олишган. Робиньо «70» рақамини танлаган бўлса, Антонио Кассано Роналдодан қолган «99»ни танлади.
Аргентина Футбол Федерацияси 1974 йилдан 1986 йилгача бўлган даврдаги жаҳон чемпионатларида жанжалларнинг олдини олиш мақсадида футболчиларга рақамларни алфавитга қараб тақсимлашни одат тусига айлантириб олганди. Шу сабабли, дарвозабон Убалдо Филол ўз дарвозасини дастлаб «5», кейин эса «7» рақами остидаги либосларда қўриқларди, ярим ҳимоячи Освалдо Ардилес ЖЧ-1982да «1» рақам остида майдонга тушиб, ҳатто рақиб дарвозасини ишғол этишга мушарраф бўлган.
«Рубин» футболчиси Гекдениз Караденизнинг футболкасидаги «61» рақам Туркиядаги Трабзон ҳудудининг автомобил кодини англатади. «Спартак»дан «Челси»га ўтган Юрий Жирковнинг эгнидаги «18» рақами эса, уни 18 млн. фунт стерлингга сотиб олинганини билдириб турган эмиш.
Максим Шацкихнинг собиқ жамоадоши Владислав Вашук «Спартак»дан «Динамо»га ўтгач, «27» рақамли либосни танлаган. Бунга унинг ўғли шу куни туғилганлиги сабаб бўлганди.
Фурқат Юсупов
