Мадриднинг "Реал" клуби ўнг қанот ҳимоячиси Даниэль Карвахаль ўзи иштирок этган энг эмоционал ўйинини эслади.
Испаниялик футболчи, айниқса, 2022 йилда "Манчестер Сити"га қарши Чемпионлар Лигаси ярим финали жавоб ўйинини алоҳида таъкидлаб ўтди. Ўшанда "қаймоқранглилар" Родригонинг қўшиб берилган дақиқалардаги иккита голи эвазига мағлубиятдан қутулиб қолишди, қўшимча бўлимда эса яна бир гол уриб, икки ўйин натижасига кўра ғалабани илиб кетишди - 6:5.
"Бу мен бошимдан кечирган энг ўзига хос кеча эди. Қўшиб берилган дақиқалардаги голлардан сўнг ақл бовар қилмас ҳиссиётлар, стадионда ақл бовар қилмас муҳит ҳукм сурарди. Биз бир-биримизга тикилардик ва ўзимизни Колизейда гладиаторлардек ҳис қилардик," - дея Карвахалнинг сўзларини келтиради Madrid Xtra.
