Россия терма жамоасининг собиқ футболчиси Андрей Аршавин Жаҳон чемпионати-2026 доирасидаги сафаридан олган таассуротлари билан ўртоқлашди.

— Андрей Сергеевич, Жаҳон чемпионатига узоқ сафар қилиб қайтдингиз. Қандай таассуротлар қолди?

— Энг ёрқин хотира Колумбияга қарши ўйин пайтида Ўзбекистон мухлислари секторига борганим бўлди. Биринчидан, у ерда муҳит жуда шовқинли эди: барабанлар, қўшиқлар, турли чиқишлар. Иккинчидан, улар менинг фамилиямни ҳайқириб чақиришди, ҳатто «Ленинград» гуруҳининг қўшиқларини ҳам куйлашди. Энг кўп эсда қолган ҳолат шу бўлди.

— Футбол нуқтаи назаридан қайси жамоалар сизда катта таассурот қолдирди?

— Ҳозирча ҳеч қайси жамоа жуда кучли таассурот қолдиргани йўқ. Терма жамоалар ҳали турнирга мослашиб бормоқда. Фаворитлар эса гуруҳдан ҳатто учинчи ўрин билан ҳам чиқиш мумкинлигини яхши тушунишади.

Айта олмайманки, улар ўзларини аямаяпти, лекин ҳозирча имкониятларининг энг юқори чўққисини кўрсатишга ҳам уринмаяпти. АҚШ терма жамоаси менга ёқди, уларнинг ўйинини стадионда томоша қилдим. Германия ҳам яхши таассурот қолдирди. Англия — Хорватия учрашувини кўрмадим, аммо менга бу яхши ўйин бўлганини айтишди. Шунингдек, Мексика ва Колумбия мухлислари ҳам ёдимда қолди.

Маълумот учун, Жаҳон чемпионати-2026 11 июндан 19 июлга қадар Канада, АҚШ ва Мексикада бўлиб ўтмоқда. Турнирда 48 та миллий терма жамоа иштирок этмоқда. Плей-офф босқичига гуруҳларда биринчи ва иккинчи ўринларни эгаллаган жамоалар, шунингдек, учинчи ўринни олганлар орасидан энг яхши саккизта терма жамоа йўлланма олади.