Меҳмонда 5:0 ҳисобида ғалаба қозониб, ЖЧ-2014 йўлланмасини амалда нақд қилган Уругвай терма жамоаси бош мураббийи Оскар Табарез матбуот анжуманида дастлаб бу ғалаба осон бўлмагани ҳақида гапириб, кейинчалик ўз фикрини инкор қилди. Сўзининг охирида эса, ўз майдонида ҳам шундай ғалабага умид қилаётганига шама қилди.

"Йирик ғалабадан қониқдим, хурсандман. Аммо бу осон бўлгани йўқ. Чунки рақибимиз узоқ вақтдан буён ўз майдонида ютқазмай келаётганди.

Иордания яхши ўйнади ва биз учун яхши рақиб бўлди. Аммо барибир, очиғини айтганда, бундай йирик ҳисобни ҳеч ҳам кутмагандим. Бу қадар осонликча ғалаба қозонишимизни ҳам.

Бундай катта ҳисобдаги ғалабага қарамай, биз энг яхши ўйинимизни кўрсатдик дея олмайман. Асосан бизнинг ҳужумимиз ва Иорданиянинг ҳимояси ўртасидаги тавофут ғалабага замин ҳозирлади.

Иккинчи ўйин режасига бирор ўзгартириш киритмоқчи эмасман. Чунки ўша куни стадионга чипта сотиб олиб кирган мухлисларимизни ҳам хурсанд қилишимиз керак ахир.

Бугунги рақибимизга қарши эса яна бир бор яхши ўйин кўрсатишимизга ва ЖЧ йўлланмасини нишонлашимизга умид қилиб қоламан", - деди Оскар Табарез.