8 ноябр куни Россия Спорт янгиликлари агентлиги таҳририяти раҳбари Василий Конов Сочида ўтказиладиган қишки Олимпиада ўйинларида журналистлар воқеа-ҳодисалар, спортчилар ва томошабинларни суратга ёки видеога тушириши тақиқланиши ҳақида маълум қилди.
Шунингдек, Олимпиада ишқибозлари ва томошабинлар ҳам мусобақаларга фото ва видеоаппаратларни олиб кира олмайди.
Конов бу қоидаларга амал қилмаган журналистларни аккредитациядан вақтинчалик ёки бутунлай маҳрум қилиш каби жиддий жазолар кутиши мумкинлигини таъкидлади.
The Verge нашри ушбу баёнотга жавобан, журналистлар мусобақалар вақтида Instagram, Vine ва бошқа ижтимоий тармоқларга улана олмаслиги, натижада Олимпиада янгиликлари ҳақида тезкорлик билан хабар бериш имкониятидан маҳрум бўлишини қайд этди. Нашр, шунингдек, 2012 йил Лондонда ўтказилган ёзги Олимпиадада бундан тақиқларнинг бўлмаганини ҳам таъкидлади.
Бундай норозилик оҳангидаги хабарларга чек қўйиш мақсадида Халқаро Олимпия қўмитаси матбуот вакили Марк Адамс журналистларга фотосуратга олиш ва уларни ижтимоий тармоқларга жойлашга рухсат берилиши ҳақида USA Today нашрига маълум қилди.
Таъкидлаш жоиз, Марк Адамснинг баёноти Сочи Олимпиадаси расмий сайтига жойлаштирилган матбуот сиёсатига тўғри келади.
Ижтимоий тармоқлар учун видеоларни суратга олиш ҳақиқатда тақиқланган бўлиб, бу Сочи Олимпиада ўйинларини трансляция қилиш ҳуқуқи чеклови сабабли киритилган.
