Яқинда якунига етган 2013 йилги футбол мавсуми Тошкентнинг «Локомотив» клуби учун омадли бўлди. Ўзбекистон XХII миллий чемпионатида темирйўлчилар ўз тарихида илк бор кумуш медалга сазовор бўлишди. Яъни ўтган мавсумда қўлга киритилган бронза медали сифат жиҳатидан бироз яхшиланди. Демак, қайсидир маънода жамоада юксалиш кузатилди, дейиш мумкин. Шунингдек, Ўзбекистон кубоги баҳсларида «Локомотив» ярим финалгача етиб борди ва бу ерда ҳам ўтган йиллардаги натижалар ижобий томонга ўзгарганлиги кўзга ташланади.

2013 йилги мавсумда «Локомотив» жамоаси мураббийлари чемпионат ўйинларида жами 28 нафар футболчига ишонч билдиришди. Ана шу футболчилардан уч нафари – Ислом Тўхтахўжаев, Акмал Холматов, Жасур Ҳасанов барча ўйинларда иштирок этишган. Дилшод Жабборов ҳамда Виктор Карпенко эса атиги биттадан ўйинни ўтказиб юборишди. Майдонда ўтказилган вақт борасида ҳам Тўхтахўжаевга етадигани йўқ – 2319 дақиқа. У 25та ўйинни тўлиқ ўтказгани ҳолда фақат бир марта заҳирадаги футболчи билан ўрин алмашган.

«Локомотив»нинг мавсум-2013даги тўпурари номига бу йил ҳам Тожиевлар сулоласи вакили сазовор бўлди, фақат бу сафар кичик Тожиев, яъни Фарҳод ғолибликни қўлга киритди. У 13 ўйинда рақиблар дарвозасини 17 марта ишғол қилди. Бу борада иккинчи яхши кўрсаткич жамоамиз юрагига айланиб бораётган Акмал Холматовга тегишли – 26 ўйинда 10та гол. 37 ёшли футболчи «Локо»да ўзининг иккинчи ёшлигини бошдан кечирмоқда, десак муболаға қилмаймиз. Холматов темирйўлчилар сафида нафақат ўзининг «козыри» бўлган жарима зарбалари орқали, балки ўйин жараёни ва ҳаттоки бош билан ҳам рақиб дарвозасини ишғол этишнинг уддасидан чиқди. «Локомотив»нинг тўпурар ўйинчилари орасида кейинги кўрсаткични Иван Нагаев қайд этди. Миллий терма жамоамиз аъзоси жорий мавсумда рақиб жамоалар дарвозасига 9 марта йўл топишга муваффақ бўлди.

Жамоамизнинг «қўпол» футболчилари рўйхатини Ислом Иномов бошқариб турибди. У мавсум давомида 6 марта ҳакамлардан ўзига хос «сийлов» қабул қилиб олди. Аммо, қувонарли жиҳати ушбу мавсумда «Локомотив»нинг ҳеч бир футболчисига қизил карточка кўрсатилмади. Бу борада темирйўлчилар миллий чемпионатимизда энг яхши натижани қайд этишди ва айтиш мумкинки, мавсум якуниларига кўра Ўзбекистон ПФЛ томонидан «Fair play» соврини билан тақдирланишга асосий даъвогар бўлиб турибди.

Қуйида «Локомотив» футболчиларининг ушбу мавсумдаги кўрсаткичлари билан танишасиз.