Ўзбекистон миллий терма жамоаси бугундан бошлаб Осиё кубоги-2015 саралаш босқичининг 5-тур учрашувига тайёрларликни давом эттирди. Жамоа шаҳарнинг марказида жойлашган "Монг Кок" стадионида машғулот олиб борди. Бу ҳақда ЎФФ матбуот хизмати вакили Бахтиёр Маметов Твиттер орқали хабар тарқатди.

Машғулот чоғида мураббийлар терма жамоанинг техник ва тактик жиҳатларга эътибор қаратишди. Бундан ташқари, стандарт вазиятларга ҳам алоҳида урғу берилди. Умуман олганда, жамоа Гонконг билан ўйинга тайёр деб айтса ҳам бўлаверади. Футболчиларнинг руҳий тайёргарлиги ва кайфияти жойида. Терма жамоанинг ҳар бир аъзоси муҳим ўйинга жиддий тайёрланяпти.

Эртага, 18 ноябрь куни учрашувдан олдинги матбуот анжумани ўтказилади. Қолаверса, икки жамоа менежерлари иштирокида учрашув бўлиб ўтади. Куннинг иккинчи ярмида эса Ўзбекистон терма жамоаси ўйиндан олдинги расмий машғулотини ҳам ўтказади.

Гонконгдаги об-ҳаво шароити тўғрисида гапирадиган бўлсак, ҳозирда ушбу мамлакатда ўртача 20-25 даражадаги илиқ ҳаво ҳукм сурмоқда. Аммо намлик анча юқори - 70 фоиздан ортиқ.

Эслатиб ўтамиз, Гонконг ва Ўзбекистон терма жамоалари ўртасидаги ўйин 19 ноябрь куни соат 17:00да бошланади.