“Бухоро”га янги бош мураббий этиб Эдгар Гесс тайинлангач, ишсиз қолган Тачмурод Агамуродов бундан буён “Машъал”ни бошқараркан деган гап-сўзлар тарқалди. Шунингдек, Юрий Саркисяннинг ҳам Муборакка келиши ҳақида миш-мишлар юрибди.
Лекин буларнинг бари миш-мишдан бошқа нарса эмас. Негаги клубнинг амалдаги бош мураббийи Александр Хомяков яқинда шартномасини яна бир йилга узайтирди. Бу эса бир йиллик танаффусдан сўнг яна олий лигага қайтган “Машъал”ни янги мавсумга айнан Александр Андреевич тайёрлайди деганидир.
Шу кунларда Александр Хомяков “Про” лицензияси учун ташкил қилинган курсларда таҳсил олмоқда. У келаси йил “Про”ни қўлга киритади ва бемалол олий лигада бош мураббий сифатида ишлаш имконига эга бўлади. Муборакликлар устозининг маълум қилишича, “Машъал” янги чемпионатга тайёргарликни декабрь ойининг ўрталарида бошлайди.
