Ўзбекистон терма жамоаси ва Қозоннинг «Рубин» клуби ярим ҳимоячиси Вагиз Галиулин Европа лигасининг 2-квалификация раундида жароҳат олиб, операция қилинган эди. Ҳозир футболчи Қозонга қайтди ва рус журналистларининг саволларига жавоб қайтарди.

– Вагиз, мухлислар сизнинг ҳолатингиздан хавотирда. Тикланиш жараёни қандай кечмоқда?
– Мени эсдан чиқаришмаганидан хурсандман. Ҳозирда ўзимни яхши ҳис қилмоқдаман. 16 ноябр куни Германиядан қайтдим. Ҳаммаси яхши кетяпти.

– Қачон майдонга қайтишни мўлжаллаяпсиз?
– Ҳозир жароҳатим безовда қилмаяпти. Худо хоҳласа келаси йилдан майдонга қайтаман. Тезроқ жамоага фойдам тегишини хоҳлайман.

– «Рубин» ҳозирда турнир жадвалининг 10-поғонасини эгаллаб турибди. Бунинг сабаби нима деб ўйлайсиз?
– Албатта, жамоа ўзига ярашмаган поғонада турибди. Лекин ишончим комилки, бу вақтинчалик. Бу ҳолатдан чиқиб кетишимизга ва турнир жадвалида кўтарилишимизга ишонаман.

Мухлислардан жамоани қолган ўйинларда ҳам қўллаб-қувватлашларини сўраб қоламан. Биз эса уларни хурсанд қилиш учун ҳаракат қиламиз»,- дейди Вагиз.