Бугун Уммонда илк марта ташкил этилаётган 22 ёшгача бўлган ёшлар ўртасидаги Осиё чемпионати бошланишидан хабарингиз бор. Илк учрашувлар Тошкент вақти билан соат 18:00га белгиланган. Oman Daily`нинг ёзишича, очилиш маросими чоғида барча иштирокчиларнинг байроқлари стадионга олиб тушилади. Ушбу вақтда нафақат мезбон Уммон, балки бошқа мамлакатлар вакиллари ҳам турли чиқишлар билан ўз маданиятларини намойиш этиш имкониятига эга бўладилар.

"Кеча мусобақа ташкилий қўмитаси яна бир бор барча тайёргарликни кўздан кечириб чиққан ва бу борада камчиликлар йўқлигига гувоҳ бўлган. Демак, Уммон мусобақага тўлиқ тайёр", деб ёзади манба.

Хабарда келтирилишича, Уммон терма жамоаси фан-клубига 400та чипта ажратилган бўлиб, яна қўшимча 2000та бепул чипта Уммон Султонлиги Қуролли кучлари учун ажратилган. Мухлислар 1 риялдан 5 риялгача бўлган нархда (1 риял = 2,60 доллар) чипта харид қилишлари мумкин.

Умуман олганда, мусобақанинг ҳар бир ўйинини ўртача 2000тадан томошабин бевосита кузатиши кутилмоқда. Осиё қитьаси бўйлаб эса 100 миллиондан ортиқроқ мухлис ўйинларни томоша қилади. Хабарда ушбу миқдор Хитой терма жамоасининг ҳам мусобақада борлиги билан алоҳида қайд этиб ўтилган.

Осиё чемпионати қизғин паллага кирган сари яқин араб мамлакатларидан ташриф буюрувчилар сони ҳам ортиб боради. Ўйинлар олдидан ўйингоҳлар дарвозаси барча учун 3 ёки 2,5 соат олдин очилади.