Ўзбекистоннинг биринчи рақамли теннисчиси Денис Истомин Австралиянинг Мельбурн шаҳрида теннис бўйича ўтказилаётган “Улкан тож” туркумига кирувчи Австралия очиқ чемпионатини ғалаба билан бошлади.

Якка теннисчилар мусобақасининг биринчи босқичида кипрлик Маркос Багдатисга қарши кортга чиқиб, уч сет якунларига кўра 6-4, 7-5, 6-4 ҳисобида зафар қучди ва иккинчи босқичга йўлланма олди.

Иккинчи босқичда ҳамюртимиз россиялик Дмитрий Турсунов билан куч синашади. Россиялик теннисчи биринчи босқичда Майкл Расселл (АҚШ)ни 6-2, 6-2, 6-3 ҳисобида мағлуб этди.

Агарда Денис Истомин иккинчи босқичда ҳам ғалаба қозонса, учинчи босқичда сербиялик Новак Жокович билан баҳс юритиши мумкин. Бу учун ўз навбатида дунёнинг иккинчи рақамли теннисчиси иккинчи босқичда аргентиналик Леонардо Майер қаршилигини енгиши лозим.

Эслатиб ўтамиз, эркаклар ўртасида ўтказилаётган мусобақанинг мукофот жамғармаси 14.300.777 АҚШ долларини ташкил этиб, бош соврин соҳиби 2.650.000 АҚШ доллари ва 2000 рейтинг очкосини қўлга киритади. Австралия очиқ чемпионати 26-январга қадар давом этади.