“Насаф” ПФК футбол мактабини ташкил этиш 2009 йилдан бошланган эди. Тарбияланувчиларни футбол мактабига жалб қилиш учун дастлаб вилоятдаги футбол интернатларида тарбияланётган болаларни кўрикдан ўтказиш билан бошланди. Ана шу мақсадда 2009 йилнинг апрель ойида Қарши шаҳри ва Қашқадарё вилояти бўйича Болалар биринчилиги ўтказилди.

Футбол мактаби ташкил этилгандан бир йил ўтиб, тарбияланувчилар иштирокидаги мусобақаларда яхши натижалар қўлга киритила бошланди. Қуйида “Насаф” ПФК футбол мактабининг илк ташкил бўлган кунлардан бошлаб, шу кунгача қўлга киритган ютуқларини эътиборингизга ҳавола қилмоқчимиз:

2010 йил. Мамлакатимизда фаолият юритаётган олий ва биринчи лига клублари футбол мактаблари ўртасида ўтказилган чемпионатда 1994 йилда туғилган гуруҳдан таркиб топган жамоа бош совринни қўлга киритган ва Қашқадарё вилояти кубоги соҳиби.

2011 йил. 1994 йилда туғилган гуруҳ жамоаси Қашқадарё қилояти кубоги соҳиби. 2-лигада Ўзбекистон кубогини қўлга киритишган. Худди шу йили Ўзбекистон футбол мактаблари ўртасида ўтказилган чемпионатнинг гуруҳ босқичида 1-ўрин, финалда эса 3-ўринни забт этишган. 2011 йил яна бир мусобақада, 1988 йилда туғилганлар жамоаси мамлакатимиз футбол ветеранлари хотира турнирида бош совринни эгаллашган. 1999 йилда туғилган гуруҳ аъзолари Б.Вафоев халқаро хотира турнирида фахрли 2-ўринни қўлга киритишган.

2012 йил. 1996 йилда туғилганлар гуруҳи Қашқадарё вилояти кубоги соҳиби ва Ўзбекистондаги футбол мактаблари ўртасида ўтказилган чемпионатда 2-ўрин соҳиби. 2000 йилда туғилган гуруҳ аъзолари шу йилда туғилганлар ўртасида ўтказилган футбол фестивалининг бош совринини қўлга киритишган. Ана шу йили яна шу гуруҳ аъзолари томонидан Ўзбекистон футболи ветеранлари хотира турнирида 3-ўринни банд этишган.

2013 йил. Ушбу йилда “Насаф” ПФК футбол мактаби нафақат мамлакатимизда балки хорижий давлатларда ўтказилаётган нуфузли мусобақаларда ҳам иштирок этган. Жумладан, 2000 йилда туғилганлар гуруҳи аъзоларидан ташкил топган жамоа Украинада ташкил этилган, Украинада хизмат кўрсатган мураббий ҳамда жисмоний тарбия ва спорт соҳасида хизмат кўрсатган унвони соҳиби Киянченко В.Г. хотирасига бағишланган I Халқаро турнирнинг бош совринини юртимизга олиб келишган. Ўтган йили футбол мактаби тарбияланувчилари томонидан мамлакатимизда ўтказилган бир қанча хотира турнирларининг совринларини, вилоят кубогини, ОФК томонидан ташкил этилган футбол фестивалидаги фахрли ўринни эгаллашган. Футбол мактабининг яна бир муваффақияти, уларга олий ва биринчи лига футбол мактаблари ўртасида  ўтказилган чемпионатда тенг келадигани топилмади, 1997 йилда туғилган гуруҳи чепионлик шоҳсупасига кўтарилишди. Худди шу гуруҳ аъзолари, шунингдек, 2013 йилда футбол бўйича Қашқадарё вилояти чемпионлигини ҳам қўлга киритишди.

Албатта бундай совринларни қўлга киритиш ўз-ўзидан бўлгани йўқ. Футбол мактабига украиналик мутахасис, футболни ва болаларни жон дилидан севадиган инсон - Кучеренко Сергей Петрович раҳбарлик қилиб келмоқда, айнан мана шу мутахассиснинг саи-ҳаракатлари эвазига мактаб фаолияти кундан-кунга ривожланиб, унинг мавқие ҳам ортиб бормоқда. Бугунги кунда ушбу футбол мактабига юртимизнинг турли жойларидан ўз фарзандларини етаклаб келаётган ота-оналар жуда кўпчиликни ташкил қилади.

Ушбу жонкуяр раҳбар билан елкама-елка туриб воҳа футболи обрўйини ошишида вақтида фидойи меҳнат қилган, ҳозирги кунда эса ўзининг бой тажрибасини ёшларга тинмай ўргатиб келаётган  Нурали Султонов, Рустам Тагаев, Евгений Смирнов, Павел Кшнякин каби кўплаб мураббийлар фаолият юритиб келишмоқда.

“Насаф” ПФК футбол мактабининг тарбияланувчилари энди клуб ва футбол мактаби раҳбарияти ҳамда мураббийлар штабининг қарорлари кўра, жамоанинг асосий таркибига ҳам қабул қилина бошланди. Жумладан, Одил Ҳамробеков, Мирзамурод Жўрабоев, Дониёр Нарзуллаев, Нажмиддин Нормуродовлар бугунги кунда “Насаф” жамоасининг асосий таркиб ўйинчилари ҳисобланишади. “Насаф”нинг ўринбосарлари жамоаси таркиби эса 9 нафар мактаб тарбияланувчилари фаолият юритишади.

“Насаф” ПФК раҳбарияти ва бош хомий томонидан футбол мактабидаги яратилган шароит ривожланган давлатлардаги футбол мактабларида яратилган шароитдан асло қолишмайди. Мактаб ихтиёрида иккита футбол майдони, ётоқхоналар, ошхоналар ва тренажёр заллари ҳамда назарий билимлар олиш учун кўплаб жиҳозланган ўқув хоналари бор.

Футбол мактабининг яна бир энг диққатга сазовор фаолиятларидан бири ўтган йилдан бошлаб, 6 ёшли маҳаллий болаларни ҳам мактабга жалб этишни бошлади. Жажжи болажонлар айнан футбол мактабида миллионлар ўйини бўлган футболнинг илк сирларидан сабоқ олишни бошлашди. Бундан маҳаллий ота-оналар ҳам жуда мамнун бўлишмоқда. Жажжи болажонлар ҳам “Насаф” ПФК қошидаги тикув цехи томонидан тайёрланган футбол формалари ва эпикировкалар билан таъминланган. Бу ҳолат уларда ўз-ўзидан “Насаф” клубига ҳурмат ва меҳр болалигиданоқ пайдо бўлмоқда. Спортга ва футболга қизиқишни ривожлантирмоқда.

Биз бундан бўён “Насаф” футбол мактаби ҳаётидан ҳамда мураббийлари ва уларнинг тарбияланувчилари ҳақида сайтимиз орқали мунтазам ёритиб боришни режамизга киритдик. Сайтимиздан узоқлашманг.

Зиёдулла Сафаров тайёрлади.