Хабарингиз бор, кеча «Локомотив» Хитойнинг «Бейцзинг Гоан» клуби билан назорат учрашувини ўтказиб, кичик ҳисобда мағлубиятга учради. Ушбу ўйин тафсилотлари билан жамоа спорт директори Равшан Муқимовни суҳбатга тортдик ва у ўз фикрлари билан ўртоқлашди.

«Бирлашган Араб Амирликларидаги ўқув-машғулот йиғини режадагидек кетмоқда. Футболчилар ва мураббийлар штаби ушбу йиғинда астойдил мавсумга тайёрларлик кўришмоқда. Абу Дабида 4 та назорат учрашувини ўтказишни режалаштирганмиз. «Қайрат» ва «Бейцзинг Гоан» клублари билан бўлиб ўтган ўйинларда футболчиларимиз жудаям яхши ҳаракат қилишди. Сўнгги учрашувда мағлубиятга учраган бўлсакда, футболчиларнинг майдондаги ҳаракатларидан кўнглимиз тўлди. Хитойликлар дарвозаси олдида кўплаб ҳужумлар ташкил қилдик, аммо омад биздан бироз юз ўгирди. Ушбу ўйинларда барча футболчиларга имкон беришга ҳаракат қилишяпти мураббийларимиз. Олдинда яна назорат ўйинларимиз бор ва ушбу кучли футбол клублари билан бўладиган учрашувлар албатта бизнинг фойдамизга ҳизмат қилади», - дейди Равшан Муқимов клуб расмий сайтига берган интервьюсида.