Олдин хабар берганимиздек, Корея матбуотидаги хабарларга кўра, Сервер Жепаров ўз клуби "Сеонгнам" томонидан трансферга қўйилган. Ҳақиқатан ҳам, клуб раҳбарияти ва мураббийлар штабида ўзгариш бўлган, аммо ҳали трансферлар ҳақида гап-сўз йўқ экан. Бу ҳақда Сервернинг ўзи мухбиримизга берган интервьюсида маълум қилди.

— Корея матбуотидаги хабарларни ўқидим. Ҳақиқатан ҳам, клубда ўзгаришлар бўлаётгани рост. Ҳар куни янги бир янгиликка дуч келиш мумкин, — дейди Жепаров.

— Янги мураббий иш бошладими?
— Ҳа, Ан Ик Су истеъфога чиқарилиб, Парк Жонг Хван бош мураббий бўлди. Табиийки, янги мутахассис жамоага янгиликларни тадбиқ этади. Лекин қандай? Бу бизга қоронғу. Қолаверса, клуб раҳбарлари ҳам ўзгарди. Жамоанинг ўтган йилги натижалари қониқарсиз деб топилди.

— Парк Жон билан гаплашдингизми?
— Йўқ, ҳали мураббий билан гаплашмадим. 31 январь куни Туркияга илк хориж йиғинини ўтказиш учун жўнаб кетамиз. Анталиядаги йиғинга борадиган футболчилар рўйхатига киритилган эканман, демак ҳамон Сеонгнам клуби аъзосиман.

К.АЛИМОВ суҳбатлашди