«Локомотив» футбол клуби шу кунларда Осиё Чемпионлар лигаси саралаш ўйинларига қизғин ҳозирлик кўрмоқда. Зеро, темирйўлчилар жамоаси олдига қитъамиз клублари ўртасида энг нуфузли турнирда муносиб қатнашиш вазифаси қўйилган. Бир ўйиндан иборат плей-офф босқичида арзимас хато ҳам жамоа учун қимматга тушиши мумкин. Агар бу хато футбол ўйини қоидалари билан боғлиқ бўлса, бундан ёмони йўқ. Бу ўринда футболчилар ўйин қоидаларини қай даражада билиши ҳам муҳим аҳамият касб этади. Шу боис «Локомотив» футбол клуби ЎФФнинг Ҳакамлар ва назоратчилар бошқармаси билан ҳамкорликда жамоа аъзолари учун футбол ўйини қоидалари ва ундаги ўзгаришларга бағишланган семинар ташкил қилди.

Даставвал жамоа бош мураббийи Ҳаким Фузайлов йиғилганларга ушбу семинарнинг қанчалик муҳимлиги ҳақида қисқача тўхъталиб ўтди ва футболчилардан семинарга эътиборли бўлишларини сўради. Шундан сўнг миллий тоифадаги ҳакам Александр Попов «Локомотив» жамоаси аъзоларига футбол қоидаларидаги сўнгги ўзгаришлар, айниқса кейинги пайтларда кўп баҳс-мунозараларга сабаб бўлаётган «офсайд», яъни ўйиндан ташқари ҳолат қоидалари ҳақида маълумот берди. ФИФА томонидан ушбу қоидага киритилган ўзгаришлар билан таништирди ва буни аниқ мисоллар воситасида, ўйинлардан олинган видеолавҳалар ёрдамида кўрсатиб берди. Шунингдек, қандай ҳолатда тўп қўл билан ўйналган, деб ҳисобланиши ва шунга ўхшаш бошқа ҳолатлар бўйича ҳам тушунтириш бериб ўтди. Қизғин баҳс-мунозаралар остида ўтган семинар «Локомотив» жамоаси аъзоларига масъулиятли ўйинлар олдидан фойдали бўлди.