Бобслей бўйича Ямайка терма жамоаси Сочига учиб келиш вақтида ичида икки ўринли боби ҳам бўлган багажини йўқотиб қўйди. Бу ҳақда «Спорт-Экспресс» нашри хабар бермоқда.

Спорт жиҳозининг йўқлиги сабаб, ямайкалик спортчилар олимпия трассасидаги биринчи машғулотни ўтказиб юборишга мажбур бўлишган. Агар, яқин вақт ичида багажни қайта қўлга киритиш имкони бўлмаса, Ямайка терма жамоаси штаби рақиб жамоалар ёрдамидан фойдаланишга умид қилмоқда. Бобслей бўйича расмий мусобақалар 16 февраль куни старт олади.

Айни вақтда, 5 февраль куни Тошкент вақти билан тахминан 17:00да Facebook фойдаланувчиси Юрий Плохотниченко Сочига SU1782 рейси етиб келгани ҳақида хабар берди. Багажни тарқатиш вақтида Плохотниченко катта эҳтимол билан Ямайка терма жамоасига тегишли халталарни ҳам кўрган.

Бобслей бўйича Ямайка терма жамоаси интернет фойдаланувчилари томонидан йиғилган хайрия пуллари сабаб Сочидаги Қишки Олимпиада ўйинларида иштирок этишга муваффақ бўлди. Хайрия-эҳсон пуллари догкоин (dogecoin)лар – махсус электрон криптовалюталар орқали тўпланган.

Ямайкалик бобслейчиларнинг қўллаб-қувватловчи гуруҳ аъзолари томонидан жами 26 миллион догкоин (20 январь курси бўйича 32,2 минг АҚШ доллари) тўплашга муваффақ бўлинди. Кейинроқ бу электрон пуллар нисбатан машҳурроқ ва барқарорроқ бўлган бошқа электрон валюта – биткоинларга алмаштирилди.