Бугун “Андижон” Тошкентда иккинчи йиғинини бошлади. Бу сафар жамоамиз “Адмирал” меҳмонхонасига жойлашди. Айтиш керакки, бугундан таркибга ҳам бир қатор янги ўйинчилар қўшилишмоқда. Машғулотларнинг дастлабки кунида жамоа сафида 5 нафар янги футболчи шуғулланди.

Литвадан келган Гедеминас Паулаускас ва Нериюс Астраускас андижонликлар билан машғулотларга киришишди. Шунингдек, дарвозабон Артур Парванов, ярим ҳимоячилар Мирзакамол Камолов ва Собир Усмонхўжаев “Андижон” билан машғулотларни бошлашди.

Бу футболчилар орасида Камолов учун “Андижон” бегона жамоа эмас. Чунки у 2008-2010 йилларда ҳам бу жамоа шарафини ҳимоя қилган. Камоловнинг фаолиятидаги энг яхши ўйинлари ҳам айнан “Андижон” билан боғлиқ десак муболаға бўлмайди. Уч йиллик танаффусдан сўнг ярим ҳимоячи “Андижон”га қайтмоқда.

“Локомотив”даги фаолиятлари орқали мухлисларга яхши тиниш бўлган Парванов билан Усмонхўжаев ўз омадларини энди “Андижон”да синаб кўришмоқчи. Ҳозирча бу футболчилар кўрикдан ўтказилмоқда. Шунингдек, яна икки кундан сўнг таркибга ҳужумчи Даврон Мирзаев ҳам қўшилади. Россиянинг “Рубин”, “Химки” ва “Нефтехимик” клубларида тўп сурган бу ҳужумчини мураббийлар ПФЛ Кубоги турнирида синаб кўришади. Бундан ташқари африкалик футболчилар ҳам кўрикдан ўтказилади. Аввалги йиғинларда иштирок этган футболчилардан Омад Тойлоқов кўрикдан ўта олмади ва унга жавоб берилди.

ПФЛ Кубоги бошлангунига қадар "Андижон" эртага “Бунёдкор” ўринбосарларига қарши назорат учрашувида майдонга тушади.