10 февраль, душанба куни анъанавий ПФЛ Кубоги мусобақанинг 2014 йилги баҳслари старт олди. Жами 16 жамоа иштирок этаётган мусобақанинг «А» ва «В» гуруҳларида 1-тур учрашувлари бўлиб ўтди.

«А» гуруҳидаги ўйинларни «НБУ-Осиё» ва «Пахтакор-2» ўртасидаги ўйин очиб берди. ЎФФ сунъий қопламали майдонида бўлиб ўтган ўйинда таркибини Юрий Цой, Леонид Кошелев, Алексей Николаев, Абдумажид Тоиров ва Зайниддин Тожиев каби футболчилар билан кучайтирган «НБУ-Осиё» футболчилари ёш «пахтакорчилар»ни 2:1 ҳисобида мағлуб этишди.

Гуруҳнинг иккинчи учрашуви ҳам, режа бўйича, ЎФФ сунъий қопламали майдонида ўтказилиши керак эди, бироқ об-ҳаво шароити ноқулайлиги сабаб, «Обод» стадионига кўчирилди. Унда Олий Лига-2014 дебютантлари – «Андижон» ва «Машъал» ўзаро баҳс олиб боришди. Ўйин 2013 йилги Ўзбекистон Биринчилиги ғолиби – «Машъал»нинг 2:1 ҳисобидаги ғалабаси билан якунига етди.

«В» гуруҳида биринчи бўлиб «Динамо» футболчилари «Қўқон-1912»га қарши майдонга чиқишди. Самарқандликлар устунлиги остида ўтган ўйин «Қўқон-1912»нинг 0:3 ҳисобидаги мағлубияти билан якунига етди. «Динамо»га ғалаба келтирган голлар Санъат Шихов, Ғулом Ўрунов ва Шаҳбоз Эркинов ҳисобига ёзили. «Бунёдкор» академияси майдонида бўлиб ўтган гуруҳнинг иккинчи ўйинида «Сўғдиёна» футболчилари «Бунёдкор-2»ни 3:1 ҳисобида мағлубиятга учратишди.

«А» ва «В» гуруҳларидаги навбатдаги тур ўйинлари 12 февраль, чоршанба куни ўтказилади. Шу куни «НБУ-Осиё» «Машъал» билан, «Пахтакор» «Андижон» билан, «Қўқон-1912» «Бунёдкор-2» билан ва «Динамо» «Сўғдиёна» билан баҳс олиб боради.

11 февраль куни ПФЛ Кубогининг «С» ва «D» гуруҳларида биринчи тур ўйинлари бўлиб ўтади. «С» гуруҳидаги учрашувларнинг бошланиш вақти ва жойига ўзгартириш киритилган.

ПФЛ Кубоги-2014
«А» гуруҳи, 1-тур учрашувлари
10 февраль, душанба
«Пахтакор» – «НБУ-Осиё» 1:2
«Андижон» – «Машъал» 1:2

«В» гуруҳи, 1-тур учрашувлари
10 февраль, душанба
«Динамо» – «Қўқон-1912» 3:0
«Сўғдиёна» – «Бунёдкор-2» 3:1