Россия 1» телеканали бошловчиси Дмитрий Губерниевнинг шахсий сайтидаги Ўзбекистон халқидан узр сўраб ёзилган мурожаатнома йўқолиб қолди. Бу ҳақда Daryo.Uz хабар бермоқда.

Хабар беришларича, сайтдаги мурожаатнинг сарлавҳаси ва унга билдирилган фикрлар жойида турибди, бироқ хабар матни йўқолиб қолган. Хабарда Дмитрий Губерниев Олимпиада очилиш вақтида Ўзбекистон терма жамоасини, хато қилиб, Тожикистон деб таништириб юборгани учун узр сўрагани ва Сочидаги мусобақаларда ўзбекистонлик спортчиларга муваффақият тилаши ёзилган эди.

Шунингдек, сайтнинг бош саҳифасида айнан Ўзбекистон вакиллари чиққан пайти акс эттирилган сурат бор эди, ҳозирда у ҳам олиб ташланган.

Айни вақтда, шарҳловчининг Twitter микроблоглар хизмати ва «ВКонтакте» ижтимоий тармоғида ўзбекистонликларга қилган мурожаатлари, кечирим сўраганликлари жойида турибди.

Daryo.Uz’нинг ёзишича, «Губерниев сайтидаги камчилик шунчаки техник хато ёки хакерлар ҳужуми оқибати бўлиши мумкин».