Сочи олимпиадасида фигурали учиш бўйича эркаклар яккалик баҳсларининг қисқа дастурларини ижро этишди. 29 нафар иштирокчидан (Евгений Плюшенко жароҳати сабаб олимпиада баҳсларида иштирок этмайдиган бўлди) 24 нафари бугун бўладиган эркин дастурда иштирок этиш ҳуқуқини қўлга киритди ва улар орасида ўзбекистонлик Миша Ге ҳам бор.

Қисқа дастур бўйича ҳакамлар томонидан 68,07 баллга муносиб кўрилган ҳамюртимиз 18-ўринни эгаллади. Демак, у эркин дастурни ижро этиш учун еттинчи бўлиб муз устига чиқади. Бугунг баҳслар 20:00да бошланади.

Қисқа дастурдан сўнг япониялик Юдзуру Ханю 101,45 балл билан пешқадамлик қилмоқда. Иккинчи ўринга канадалик Патрик Чан жойлашди (97,52). Учинчи ўриндан бошлаб спортчиларнинг баллари эса жуда зич жойлашган.