Фарғонанинг "Нефтчи" жамоаси мавсумлар оралиғида кўплаб янги футболчиларни ўз таркибига қўшиб олмоқда. Улар орасида энг ёши бўлган Азамат Илёсов — 17 ёшда. Ўйин услуби ҳамда ташқари кўриниши Леонель Мессига ўхшаш ушбу ёш футболчи секин-асталик билан жамоага кўникмоқда. "Ўзбек Месси"си билан суҳбатни эътиборингизга ҳавола этамиз.

— Азамат, Нефтчи"га келиш тарихи қандай содир бўлди?
— Мен биринчи лиганинг "Орол" жамоасида тўп суриб юргандим. Жамоамиз устозига Мурод ака мурожаат қилиб, "Нефтчи" сафида ўзимни кўрсатиш учун имконият беришини айтиб қолди. Мен ва мураббийларим бунга рози бўлдик. Айни пайтда фарғоналиклар машғулотида иштирок этяпман.

— "Нефтчи"да ўзингизни қандай ҳис қиляпсиз?
— Жуда ҳам яхши. Жамоадаги футболчиларнинг менга бўлган муносабатлари ёмон эмас. Мурод ака билан ишлаш ҳам менга манзур бўлмоқда.

— 17 ёшда экансиз. Ўзингиздан анча катта бўлган профессионал футболчилар орасида тўп суриш қийин эмасми?
— Албатта қийин бўляпти. Худо хоҳласа, муҳитга тез орада кўникаман. Янги мавсумдаги мақсадим — асосий таркибга кириш. Яна Дилёр Эрматов билан ўйинда бир-биримизни яхши тушуняпмиз. Шунингдек, бошқалар билан ҳам.

— Сизни "Месси" деб чақиришлари қандай қарайсиз ?
— Тўғри, ҳамма мени шундан атайди (кулади). Бундай деб аташларига қарши эмасман ва албатта ана шу футболчига ўхшашга ҳаракат қиламан.

Рухсор ТРК спорт мухбири Ҳожиакбар Жабборов суҳбатда бўлди.