Футбол бўйича 2015 йилги Копа Америка (Жанубий Америка чемпионати) баҳсларида Осиё вакили – Хитой терма жамоаси ҳам иштирок этади. Бу ҳақда Triballfootball.com хабар бермоқда.
WildEastFootball.net’нинг ёзишича, мусобақада Осиёдан Хитой эмас, балки Япониянинг иштирок этиши кутилаётган эди, бироқ японлар Европа чемпионатларида тўп сураётган футболчиларни безовта қилишни хоҳламагани сабаб, КОНМЕБОЛ таклифига Хитой рози бўлди.
Копа Америка мусобақаларида Жанубий Американинг 10 терма жамоаси ва яна икки меҳмон жамоа – бошқа қитъа вакили иштирок этади. Жумладан, 1999 йилги мусобақаларда Япония терма жамоаси иштирок этган.
Ўтган ҳафта франциялик мутахассис Ален Перрен Хитой миллий терма жамоаси бош мураббийи этиб тайинланган эди. Мураббий учун дастлабки синов 5 март куни БААда бўлиб ўтадиган Ироққа қарши Осиё Кубоги-2015 ўйини бўлади.
Агар хитойликлар ушбу ўйинда ғолиб чиқишса, Осиё Кубоги-2015 финал босқичини қўлга киритишади ва 2015 йилда иккита қитъа чемпионатида иштирок этиш имконига эга бўлишади.
Осиё Кубоги-2015 баҳслари январь ойида Австралияда ташкил этилса, Копа Америка-2015 ғолиби июнь-июль ойларида Чилида ўтказиладиган мусобақалардан сўнг маълум бўлади.
