"Милан" раҳбарияти жамоа ҳужумчиси Марио Балотеллининг ўз твиттерида сурат чоп этиб, пинг-понг ўйнашни тавсия этгани юзасидан норозилик билдирди. Gazzetta dello Sport‘нинг ёзишича, клуб Италия термасининг елкасидан жароҳат олган ҳужумчиси ҳолатидан кўнгли тўқ эмас.
"Барчага хайрли кеч. Агар кимдир мени юта оламан деб ўйласа, буни айтсин. Ўшанга барча ставкамни тикаман. Мен ҳеч қачон ютқазмаганман", - деб ёзган Балотелли сурат остига.
Қайд этиш керак, "Милан" ҳужумчиси уч ўйинни ўтказиб юборди. "Сампдория" ва "Ювентус"га қарши ўйинлардан ташқари, Испанияга қарши ўртоқлик учрашуви ҳам ортда қолди. Балотеллининг майдонга қайтиши шанба куни "Удинезе"га қарши баҳсда рўй бериши ҳам сўроқ остида турибди.