Таиландда ўсмир-қизлар ўртасида ўтказилган Осиё чемпионати баҳслари ниҳоясига етди. Қитъанинг 26 давлати вакиллари иштирокида бўлиб ўтган мусобақада жорий йилнинг 16-24 август кунлари Хитойнинг Нанкин шаҳрида ўтказиладиган II ёзги ўсмирлар Олимпиада ўйинларининг йўлланмалари ҳам ўйналди.

Ўсмирлар терма жамоамиз мазкур Олимпиада ўйинлари йўлланмасига (2 та) 2013 йил Тошкентда ўсмирлар ўртасида ўтказилган жаҳон чемпионатида сазовор бўлганлиги боис, асосий эътибор қизлар терма жамоамизга қаратилди.

Эътиборлиси, қизлар терма жамоамиз ҳам мазкур Осиё чемпионатида ўзларига билдирилган ишончни аъло даражада оқлашди ва Ҳиндистон, Мўғилистон, Таиланд терма жамоалари қатори Нанкин-2014 ўйинларига 1 та йўлланмани қўлга киритди. Эслатиб ўтамиз, қитъа чемпионатида умумжамоа ҳисобида 1-4 ўринларни эгаллаган терма жамоаларга биттадан лицензиялар берилди.

Шу тариқа мамлакатимиз спортчилари томонидан Нанкин-2014 ўйинларига қўлга киритилган йўлланмалар сони 14 тага етди. Мамлакатимиз оғир атлетикачиларидан ташқари бадиий гимнастика (7 та), академик эшкак эшиш (2 та), дзюдо ( 1 та) ҳамда байдарка ва каноэда эшкак эшиш (1 та) вакиллари ҳам ўсмирлар Олимпиада ўйинлари йўлланмаларига эгалар. Олдинда яна спортнинг ўндан ортиқ турлари бўйича Нанкин-2014 ўйинларига лицензиялар ўйналадиган мусобақалар мавжуд ва ушбу мусобақаларда ҳам умидли, ёш спортчиларимизга омад ва зафарлар тилаб қоламиз.