Бугун Жанубий Кореянинг «Footbalist» интернет нашри кей-лига биринчи туридан кейиноқ чемпионатдаги фаолиятларида "қизил чироқ"қа дуч келган футболчилар ҳақида таҳлилий мақола эълон қилди.
Аввал хабар берганимиздек, "Сеонгнам"да тўп сурадиган ҳамюртимиз Сервер Жепаров бош мураббий Парк Жонг Хваннинг аччиқ киноялари нишонига айланган эди. Ушбу мақолада ҳамюртимиз ва яна икки нафар футболчиларнинг ўхшаш тақдирлари ҳақида фикр юритилган. Нашр шундай ёзади:
"Сеонгнам” бош мураббийи Парк Жонг Хван 15 март куни “”Сеул билан ўйиндан олдин жамоа сардори дарвозабон Чон Санг Вук ва Сервер Жепаровларни ўйин қайдномасига ҳам киритмади. Буни бош мураббий: "1-тур ўйинида дарвозабонимиз ишончимни оқлай олмади. Шунинг учун уни таркибдан чиқариб ташладим. Сервер Жепаровни эса футболчи дея олмайман. У жамоавий ўйинни билмайди", деди.
Сервер Жепаровнинг ҳолатига ўхшашликлар "Ульсан Хёндэ"нинг япониялик ярим ҳимоячиси Чикаши Масуданинг ҳам бошига тушди. "Ульсан"нинг 12 март куни ОЧЛ доирасида Япониянинг "Кавасаки Фронтале" клубига қарши кечган ўйиннинг 37-дақиқасидаёқ бош мураббий Чо Мин Гук жаҳл билан Масудани алмаштирди. Буни ўйиндан кейин бош мураббий: "Ҳужум ва тўп оширишлари менга ёқмади", дея қисқа изоҳлаган бўлди. Шундан сўнг Масуда 16 март куни "Улсан"нинг кей-лигадаги "Кёнгнам" ва 19 март куни ОЧЛдаги Хитойнинг "Гуичжоу" клубларига қарши ўйинларида кўриниш бермади.
Жепаров ва Масудадан ташқари мураббий ғазабига учраган кейинги футболчи "Поханг Стилерс" хужумчиси кореялик Бэ Чон Сок бўлди. Футболчи 11март куни ОЧЛ доирасидаги "Поханг Стилерс"нинг "Бурирам"га қарши ўйиннинг иккинчи бўлимида майдонга туширилдию, бор-йўғи 13 дақиқа ҳаракат қилар-қилмас алмаштирилди. Буни похангликлар мураббийи Хванг Сон Хонг шундай изоҳлади: "Унда ўйнаш хоҳишини кўрмадим. Чин дилдан югуриш керак эди".
Нашр футболга алоқадор бир қанча мураббийларнинг фикрларини келтириб ўтади. Жумладан, ёзилишича: "Сеонгнам”нинг собиқ мураббийи Шин Те Йонг футболчиларни "осмондан тушириб қўйиш"да анча тажрибали мураббийлардан. Ўз вақтида сеонгнамликларнинг алмаштириб бўлмас футболчилари ҳисобланган кореялик Хонг Чеол ва Болқондан келган Радончичларни майдонга туширмаслик орқали "тарбиялаш"га уринган эди. Шин Те Йонг шундай дейди: "Бирорта футболчини шахсий хусуматим туфайли синдиришга ҳаракат қилмаганман. Шунчаки клубдаги муҳитни яхшилаш ва бошқа футболчиларга намуна сифатида кўрсатиш учун шундай қилардим. Хонг Чеол доимо қайдномага киритлмаса ёки ўйинда тез алмаштирилса, ўйиндан кейин олдимга келиб сабабини сўрарди. Мен эса унинг камчиликларини тушунтириб берардим".
«Footbalist» нашри давом этиб шундай ёзади: "Аммо хорижлик футболчи масаласида бундай тарбиялаш усули қалтис натижалар келтириши ҳам мумкин. Исми сир қолиши шарти билан нашрга сўзлаган футбол мутахассиси: "Корейс ва чет эллик футболчига бу усул турлича таъсир қилади. Сен футболчи эмассан, дейиш орқали футболчига маънавий жароҳат етказиш мумкин. Бизнинг дунёқарашларимиз фарқ қилади. Корейс футболчини яккама-якка суҳбат орқали ўзига келтириш мумкин. Аммо хорижлик футболчи - бу нозик масала. Чет эллик футболчи "Менга нима, Кореяда дам олиб ўтириб, катта пул олиб кетаман", деган бефарқликка берилиб кетса, клубнинг ўзига зиён бўлади. Шунинг учун қандайдир усуллар билан футболчини ўйнатиш керак", деди.
Кўпчилик футбол намоёндалари Жепаров ва Масудаларга нисбатан қўлланилган "тарбиялаш ишлари" тескари натижа бериши мумкинлигидан хавотир билдирмоқдалар. Чунки иккала чет эллик футболчи ҳам ўтган мавсумда ўз жамоаларининг деярли юлдузларига айланишган эди. Энди улар мураббийларининг бундай муносабатини ҳазм қила олмасликлари мумкин. Бир вақтлар Хитойнинг "Цингдао" клубида мураббийлик қилган кореялик Жанг Ве Рёнг эса футболчиларга бундай муносабатни оқламаслигини билдирган: "Менинг футбол фалсафамда бундай нарса йўқ. Клубга олиндими - демак, у профессионал футболчи. Уни қандай ўйната олиш эса мураббийнинг иши".
Хуллас, кей-лига стартидаги бу уч футболчининг ҳолати ва кейинги тақдири, мураббийларининг қандай йўл тутишлари кўпчиликни қизиқтирмоқда.
Отабeк Йўлдошeв
Жанубий Корeя, Сeул
