Ўзбекистоннинг биринчи рақамли теннисчиси Денис Истомин 19-30 март кунлари Майами шаҳри (АҚШ) да ўтказиладиган "АТР Sony Open Теннис" халқаро турнирининг дастлабки босқичида муваффақиятга эришди. 

Мукофот жамғармаси 4.720.380 АҚШ долларини ташкил этган мазкур нуфузли мусобақанинг биринчи даврасида ҳамюртимиз франциялик Николя Маю билан баҳс юритиб, икки сет якунларига кўра 7-6, 7-6 ҳисобида ғалаба қозонди. 

Ҳамюртимиз иккинчи даврада россиялик Дмитрий Турсуновга қарши кортга чиқади. Ушбу учрашув 23-март куни Тошкент вақти билан соат 02:00да бошланиши режалаштирилган.

Агарда Денис Истомин дастлабки икки босқичдан муваффақиятли ўтса учинчи босқичда дунё рейтинг жадвалида карвонбошилик қилаётган Рафаэль Надалга (Испания) қарши кортга чиқиши мумкин. Бу учун ўз навбатида иккинчи босқичдан мусобақаларга киришадиган Рафаэль Надаль ҳам Ллейтон Хьюитт (Австралия)ни мағлуб этиши зарур.