“Футбол шарҳи” кўрсатувида Ислом Аҳмедов чиқиб, ЎФФ ташкилотини маслаҳатчи орган, деб айтди. Клубларнинг ҳаётига аралаша олмас эмиш. Аралашишга ҳаққи йўқ, эмиш. Яшил майдон футбол жанги эмас, очиқ-ойдин пул жангига айланиб кетган бўлса, ЎФФ четда томошақовоқ бўлиб кузатиб турсинми? Мавсум оралиғи ва ўртасида “пул жанги” авж олиб, кўч-кўч бошланиб кетса, бу “жанг майдонига” енг шимариб, қиличнимас пулни шарақлатиб энг бадавлат ҳомийдан тортиб, то энг пачоқ Клишинларгача ҳамма тушиб кетса, натижада “уруш вайронасидан яраланиб” чиққан жамоа иморатларини кўрмоқдамиз-ку. Атрофда бири кўпроқ, бири камроқ вайрон бўлган “иморатлар” бизни ўраб олган. Мавсум бошида ҳамма жамоаларимизда ўйин ҳаробаларини кўрмоқдамиз. “Бунёдкор” ўйини ҳам ҳароб, бултурги ҳамжиҳатлик ҳам, Пишурнинг зарбалари ҳам ҳароб. У ўз номига кўра бунёдкор, қурувчи. Ўз “иморатини” қайтадан бунёд этиб олади. “Локомотив” ҳам ҳеч нарса ютиб олгани йўқ. Унинг ҳам “иморати” сочилиб ётибди. У ҳам тикланиб олади. Ҳеч бир жамоа, ё футболчи уч ой ичида ўйинини ўстириб, ўйинига ўйин қўшиб мавсумга бир нима тайёрлаб олгани йўқ. Мавсум оралиғидаги пул жангида футболимиз ютқазди. Уч ой ҳеч ким футболни ўйламади. Ҳамма каттароқ пулларни “ўзлаштириб” қолай деб типирчилади. Клублар ҳомий пулларини ошираман деб тиришган бўлса, футболчилар ўз маошларини деб жамоадан жамоага кўчиб вақт ютқазишди. Натижада ҳеч ким жанг-у жадалга тайёр ҳолда майдонга тушмади. Ҳамма “состав” йиғиш билан овора бўлди.

Давоми Ҳасанали Қодиров блогида.