Тожикистон терма жамоаси кеча, 30 март куни Тожикистон чемпионатида фаолият олиб бораётган легионерлардан иборат терма жамоа билан ўртоқлик учрашувини ўтказди. Унда мамлакат терма жамоаси легионерларни 4:1 ҳисобида ғалаба қозонди.
Легионерлар терма жамоасининг ягона голи эса ўзбекистонлик Даврон Мирзаев ҳисобига ёзилди. Учрашувнинг 28-дақиқасида ҳамюртимиз Тожикистон терма жамоаси дарвозабонининг ишончсиз ҳаракатидан фойдаланиб, ҳисобни очди. Давроннинг ўзи бир бўлим давомида ҳаракат қилди.
Даврон Мирзаев "Истиқлол" сафида ҳали кўп майдонга тушаётгани йўқ. Шунга қарамай, у 2та медални қўлга киритишга муваффақ бўлди. Тожикистон Суперкубоги ва Федерация кубоги "Истиқлол"га насиб қилди. Чемпионат эса 1 ҳафтадан кейин старт олади.
